جورجیا د دغه هېواد پخوانی نوم د شوروي سوسیالیستي جمهوریت و جورجیا هېواد د شمالي نیمې کرې په ختیځ، د جنوب لوېدیځې اسیا په شمالي څنډه یا قفقاز، د روسیې فدراتیف سوېل، د تورې بحیرې پر څنډه د ترکیې او روسیې تر منځ پروت دی. مساحت یې ۲۶۹۱۱ میله مربع او د نړۍ ۱۲۱تم غټ هېواد دی. جورجیا د پراخوالي او نفوس له اړخه له اذربایجان څخه وروسته په سوېلي قفقاز کې دويم ځای لري.

نظام

د جورجیا نظام جمهوري دی، اوسنی ولسمشر یې ګیروګي مارکویلا شویلي او لومړی وزیر یې اراکلي ګاربا شویلي نومېږي. ولسمشر یې د خلکو په خوښه د پنځو کلونو لپاره ټاکل کېږي او دوه دورې د کاندېدو حق لري. د یاد هېواد پارلمان ۱۵۰ څوکۍ لري چې ۷۷ د خلکو او ۷۳ د رایو د ټولنو له خوا د څلورو کلونو لهپاره ټاکل کېږي. حقوقي نظام يې پر مدني قانون ولاړ دی، د حقوقي نظام په سر کې يې ستره محکمه ځای لري چې اوه څانګې لري. د دې محکمې مشر یا قاضي القضات او ۱۴ غړي د ولسمشر پر وړاندیز د ملي شورا له خوا ټاکل کېږي. د اساسي قانون د تفسیر لپاره د اساسي قانون محکمه لري، دا محکمه نهه غړي لري چې درې یې د ولسمشر، درې د عالي شورا او درې د سترې محکمې له خوا د لسو کلونو لپاره ټاکل کېږي.